„Oscar del Vino 2018” – ამ სახელწოდებით იტალიური ღვინოების მე-19 დაჯილდოება გაიმართა იტალიის დედაქალაქ რომში, HOTEL ROME CAVALIERI -ში. “ოსკარის“ ორგანიზატორი გახლდათ FONDAZIONE ITALIANA SOMMELIER.
ამ იტალიური ღვინის დღესასწაულში ერთი ახალგაზრდა ქართველი სომელიე გოგონაც მონაწილეობდა – მირანდა დოლაბერიძე, რომელიც ამ პროფესიას სწორედ იტალიაში დაეუფლა და მაქსიმალურად ცდილობს, სამშობლოში დაბრუნებამდე პრაქტიკული გამოცდილებაც მიიღოს.
მირანდა დღეს ჩვენი სტუმარია და მასთან ინტერვიუს გთავაზობთ.
-მირანდა, ვიცი, რომ ემოციურად დატვირთული ხარ, შეგიძლია, რომ სიტყვებით გაგვიზიარო შენი ემოცია? გვიამბო შენი შთაბეჭდილებები?
– დიდი სიამოვნებით. წელს მესამედ მქონდა ბედნიერება, რომ დავსწრებოდი იტალიური ღვინის არაჩვეულებრივ „დღესასწაულს“, ოსკარის დაჯილდოების ცერემონიალს. უფრო მეტიც, მე, ერთადერთი ქართველი სომელიე გოგონა, ვმონაწილეობდი კიდეც იტალიური ღვინოების შეფასებაში. ეს ჩემი ცხოვრების ამ ეტაპზე ძალიან მნიშვნელოვან მოვლენად მიმაჩნია. ყველაზე მეტად სწორედ ჩემს თანამემამულეებს მინდა, ვუამბო ამ დღესასწაულზე განცდილი ემოციის შესახებ, რადგან უდიდესი სურვილი მაქვს, რომ ჩემს სამშობლოში, საქართველოშიც ვიხილო ღვინის ასეთი „ოსკარი“. საქართველო ხომ მსოფლიომ უკვე აღიარა ვაზისა და ღვინის სამშობლოდ, თუმცა ჯერ კიდევ ბევრის სწავლა მოუწევს ევროპისგან და მათ შორის – იტალიისგან.
ღვინო მხოლოდ ალკოჰოლური მათრობელა სასმელი არ არის… რატომ? ჩვენს ეპოქაში იგი ხელოვნების და ისტორიის უდიდესი ნაწილია. ეს კიდევ ერთხელ განსაკუთრებულად ვიგრძენი „იტალიური ღვინის ოსკარზე“.
-იქნებ „ღვინის ოსკარის“ ცერემონიის დეტალებიც გაგვიმხილო…
საგედუსტაციო დარბაზის ელეგანტურობის აღსაწერად სიტყვები არასდროს მყოფნის…
შევეცდები, სხვა დეტალები მოგიყვეთ: „ოსკარის“ საღამოს პრეზენტატორი იყო თვით FONDAZIONE ITALIANA SOMMELIER -ს პრეზიდენტი ფრანკო მარია რიჩი. საღამოს გახსნილად გამოცხადების შემდეგ გაისმა საოცრად ამაღელვებელი ემოციური მუსიკა (მეგონა, გლადიატორები იწყებდნენ შემოსვლას) და სომელიეთა გუნდს წინ შემოუძღვა სომელიეების მთავარსარდალი, უბალდო პიცინგრილი…თითოეულ სომელიეს მარცხენა ხელში ეჭირა ამ საღამოსთვის განკუთვნილი თითო ბოთლი ღვინო.
რაც შეეხება ღვინის ნომინაციებს, იგი იყოფოდა 9 ეტაპად და თითო ნომინაციიდან წარმოდგენილი და დაგემოვნებული იყო სამ-სამი ღვინო. თითოელ ნომინაციას ჰყავდა მომხსენებელი ანუ ღვინის წარმდგენი სომელიე, რომელიც ზოგადად საუბრობდა და აცნობდა დამსწრე საზოგადეობას წარდგენილ და დასაგემოვნებლად გამზადებულ ღვინოს. კარგად რომ წარმოიდგინოთ, სომელიე ყვება კონკრეტული ღვინის ისტორიას, ეხება ვაზის ჯიშს და ტერუარის ადგილმდებარეობას.. გარდა ამისა, საუბარს აგრძელებს ბოკალში ჩამოსხმული ღვინით, ანუ ღვინის შეფასება იწყება თვალის ანალიზით _ ფერის შეფასება, შემდეგ გადადის ყნოსვით შეფასებაზე და შემდეგ უკვე ხდება დაგემოვნება ანუ ღვინის ორგანოლეპტიკის შეფასება, საბოლოოდ არის დასკვნა და „აბინამენტო“ – ზოგადი რჩევები, თუ რა კერძი შეიძლება, შევუხამოთ შემოთვაზებულ ღვინოს… თითოეული ამ ეტაპის მოსმენა ღვინის წარმდგენი სომელიესგან გამოგზაურებს გამოცდილებით სავსე ღვინის არა მარტო ისტორიაში, არამედ გაგრძნობინებს ღვინოს ხელოვნების დონეზე. ეს ყველაფერი კი დამგემოვნებელმა ბოკალში ჩასხმული 50 გრამი ღვინით უნდა შეაფასოს.
-ეს დაჯილდოება 19 წელია ტარდება, წელს რა სიახლეები იყო?
-გასული წლებისგან განსხვავებით, წელს Oscar del Vino 2018- ზე შეფასებას ახდენდა არა მხოლოდ ჟიური, არამედ დარბაზში დამსწრე 700 კაციანი საზოგადოება (აქ შეხვდებოდით: „ოსკარზე“ წარდგენილი ღვინოების მწარმოებლებს, ენოლოგებს, ცნობილ ჟურნალისტებს პრესიდან თუ ტელევიზიიდან, რესტორატორებს, რიგით სომელიეებს თუ ღვინის მოყვარულებს. მათ შორის ვიყავი მეც.
ხმის მიცემა ხდებოდა მობილურების საშუალებით, თითოეულ დამსწრეს გააჩნდა საკუთარი კოდი, რომლითაც რეგისტრირდებოდნენ www.bibenda.it საიტზე და ამგვარად აფიქსირებდნენ ღვინის თვით შეფასებას. მეამაყება, რომ ჩემს მიერ შეფასებული ღვინოებიდან ოთხმა გაიმარჯვა.
თუ შეგიძლიათ, გაგვაცანით სხვადასხვა ნომინაციაში გამარჯვებული იტალიური ღვინოები:
-დიდი სიამოვნებით. აი, სხვადასხვა ნომინაციებში გამარჯვებული ღვინოები:
ნომინაცია 1. საუკეთესო შუშხუნა ღვინო. მომხსენებელი ლუჩიანო მალოცი
Franciacorta Dosage Zero Noir Vintage Collection 2007. Ca Del Bosco
ნომინაცაი 2. საუკეთესო თეთრი ღვინო. მომხსენებელი ჯოვანი ლაი
Langhe Riesling Herzu 2014. Ettore Germano
ნომინაცია 3. საუკეთესო ვარდისფერი ღვინო. მომხსენებელი ალესია ბორელი
Etna Rosato Arcuria 2016. Calcagno
ნომინაცია 4. საუკეთესო წითელი ღვინო. მომხსენებელი მასიმო ბილეტო
Amarone della Valpolicella Classico Ca Florian Riserva 2010. Tommasi
ნომინაცია 5. საუკეთესო ტკბილი ღვინო . მომხსენებელი დანიელე მაესტრი
A.A. Mosacato Giallo Passito Baronesse Baron Salvadori 2014. Nails Margreid
ნომინაცია 6. საუკეთესო ღვინის საუკეთესო მწარმოებელი. მომხსენებელი პაოლო ლაუჩანი
Sagrantino di Montefalco 25 Anni 2013. Arnaldo Caprai
ნომინაცია 7. საუკეთესო ღვინო ხარისხის და ფასის გათვალისწინებით. მომხსენებელი ჯულიანო ლემე
Vermentino di Toscana Belvente 2016. Petra
ნომინაცია 8. საუკეთესო მომავლის ღვინო ( რომლებიც ახალია, მაგრამ ხარისხით არ ჩამოუვარდება ისტორიულ და წარმატებულ ღვინოებს)
Brunello di Montalcino Paesaggio Inatteso 2012. Camigliano
ნომინაცია 9. საუკეთესო პრემია ჟიურისგან
Cervaro della Sala 2011. Castello della Sala.
Bolgheri Sassicaia 2014. Tenuta San Guido
Masseto 2014. Ornellaia e Masseto
Brunello di Montalcino Riserva 2011. Biondi Santi
მე-9 ნომინაციაში იტალიის საუკეთესო ღვინოები იყო წარმოდგენილი, ამიტომ ჟიურის გადაწყვეტილებით, ოთხივე ნომინანტი ღვინო დაჯილდოვდა „ოსკარით“, საკუთარ მწარმოებლებთან ერთად.
ღვინოების გარდა, დასახელდა საუკეთესო ენოლოგის, საუკეთესო ღვინის ჟურნალისტის და საუკეთესო ღვინის მარკეტინგ-მენეჯერის ნომინაციებიც.
აღსანიშნავია, რომ წლის საუკეთესო იტალიური ღვინოების ოსკარი/დეგუსტაცია 6 საათი გრძელდებოდა, მასში მონაწილეობას იღებდა 50 სომელიე, წარმოდგენილი იყო ღვინის 28 ეტიკეტი, ღვინის ბოთლების განლაგება დაყოფილი იყო 4 ძირითად დახლად და თითო დახლს ჰქონდა 28 ეტიკეტის 10-10 ბოთლი ღვინო. ანუ საერთოდ ღვინოების რაოდენობა 1200 ბოთლს შეადგენდა.
„იტალიური ღვინის ოსკარი”-ს საღამომ ძალიან საინტერესოდ ჩაიარა. წლიდან წლამდე ესე დაუღალავად მუშაობენ იტალიელი სომელიეები და არა მარტო ისინი, სიახლებიის ძიებაში… ამიტომ საზოგადოებისგან შეუმჩნეველი არ რჩებიან და მათგანაც დიდ პატივისცემას, თანადგომას იღებენ.
მე თამამად შემიძლია ვთქვა, ღვინო, როგორც ხელოვნების ნიმუში,კონკრეტულად ამ იტალიურმა ორგანიზაციამ FONDAZIONE ITALIANA SOMMELIER _მა, მისმა კოლექტივმა და ეხლა უკვე ჩემმა კოლეგებმა შემაყვარეს. ვერასოდეს წარმომედგინა, ცოტაოდენი ღვინის დაგემოვნებით თუ შეიძლებოდა, ყოფილიყავი ბედნიერი, კმაყოფილი და პროფესიულად გაზრდილი.
-დიდი მადლობა, მირანდა, საინტერესო საუბრისათვის. წარმატებებს გისურვებთ და გელოდებით სამშობლოში.
ნატო გუბელაძე
